Eelamurasu Australia Online News Portal
இலங்கைக்கு எதிராக இம்மாதம் 17ஆம் திகதி ஆரம்பமாகவுள்ள 3 போட்டிகளைக் கொண்ட சர்வதேச இருபது 20 கிரிக்கெட் தொடருக்கான அவுஸ்திரேலிய குழாமில் அறிமுக வீரராக 36 வயதுடைய மைக்கல் கிளிங்கர் இணைத்துக்கொள்ளப்பட்டுள்ளார்.
அத்துடன், மூவகை சர்வதேச கிரிக் கெட் போட்டிகளிலும் விளையாடிய அனுபசாலியான விக்கெட்காப்பாளர் திமத்தி (டிம்) பெய்ன் 6 வருடங்களின் பின்னர் குழாமுக்கு அழைக்கப்பட்டுள்ளார்.
இவர்களை விட வேகப்பந்துவீச்சாளர் ஜய் றிச்சர்ட்சன், சகலதுறை வீரர் அஷ்டன் டேர்னர் ஆகியோரும் அறிமுக வீரர்களாக அவுஸ்திரேலிய இருபது 20 கிரிக்கெட் குழாமில் சேர்த்துக்கொள்ளப்பட்டுள்ளனர்.
இந்தியாவுக்கு எதிரான டெஸ்ட் தொடரில் விளையாடவுள்ள பிரதான வீரர்கள் பலர் இந்தியா செல்லவிருப்பதால் அவர்கள் இருபது 20 கிரிக்கெட் குழாமில் இணைத்துக்கொள்ளப்படவில்லை. மாறாக இளம் வீரர்களும் புதியவர்களும் குழாமுக்கு அழைக்கப்பட்டுள்ளனர்.
வழமையான அணித் தலைவர் ஸ்டீவன் ஸ்மித், டேவிட் வோர்னர், உஸ்மான் கவாஜா, மிச்செல் ஸ்டார்க், ஜொஷ் ஹேஸ்ல்வுட், க்ளென் மெக்ஸ்வெல் குழாமில் இடம்பெறாத நிலையில் அணித் தலைமைப் பொறுப்பு ஆரொன் ஃபின்ச்சிடம் ஒப்படைக்கப்பட்டுள்ளது.
சர்வதேச இருபது 20 கிரிக்கெட் தரநிலை வரிசையில் அவுஸ்திரேலியா 6ஆம் இடத்தில் இருப்பதாலும் பிரதான வீரர்கள் இந்திய டெஸ்ட் தொடருக்கு தயாராகி வருவதாலும் திறமைவாய்ந்த இளம் வீரர்கள் பலருக்கு வாய்ப்பு வழங்க தீர்மானித்ததாக அவுஸ்திரேலிய கிரிக்கெட் தெரிவுக் குழு உறுப்பினர் ட்ரவர் ஹோன்ஸ் தெரிவித்தார்.
அவுஸ்திரேலிய இருபது 20 குழாம்
ஆரொன் ஃபின்ச் (அணித் தலைவர்), மைக்கல் கிளிங்கர், ட்ரவிஸ் ஹெட், கிறிஸ் லின், மொய்சஸ் ஹென்றிக்ஸ், அஷ்டன் டேர்னர், டிம் பெய்ன், ஜேம்ஸ் போக்னர், பெட் கமின்ஸ், அடம் ஸம்பா, அன்ட்ரூ டை, ஜய் றிச்சர்ட்சன், பிலி ஸ்டன்லேக்.