Eelamurasu Australia Online News Portal
மன்னார் மாந்தை, திருக்கேதீஸ்வரம் வளைவு சம்பந்தமாக ஊடகங்கள் எதையும் வெளியிடலாம். இப் பிரச்சினையை ஒரு பெரும் பிரச்சினையென சித்தரித்து காட்டலாம். ஆனால் நாம் மதங்களுக்கிடையே நல்லிணக்கம் ஏற்பட வேண்டும் என்ற சிந்தனையிலேயே செயல்பட்டு வருகின்றோம். எந்த பிரச்சினைகள் தோன்றினாலும் அவைகள் தீர்க்கப்பட்டு சமயங்களுக்கிடையே நல்லிணக்கம் மலர வேண்டும் என நாம் அனைவரும் ஒன்றித்து இறைவனிடம் வேண்டுவோம் என மன்னார் மறைமாவட்ட ஆயர் இம்மானுவேல் பெர்னாண்டோ ஆண்டகை தெரிவித்தார்.
மன்னார் மறைமாவட்டத்தில் வருடந்தோறும் நடைபெற்றுவரும் அருட்பணி திட்டமிடல் மாநாடு கடந்த 21ஆம் திகதி முதல் மூன்று தினங்களாக மன்னார் மறைமாவட்டத்தின் குடும்ப பொதுநிலையினரின் அருட்பணி மையத்தில் மாநாட்டுச் செயலாளர் அருட்பணி ப.பி.டெஸ்மன் குலாஸ் அடிகளார் தலைமையில் இடம்பெற்றது.
இந்த மாநாட்டில் மன்னார், வவுனியா நிர்வாகத்துக்குட்பட்ட மன்னார் மறைமாவட்டத்தின் 46 பங்குகளிலிருந்தும் அருட்பணியாளர்கள், துறவிகள், பங்குகளின் மேய்ப்புப்பணி சபை பிரதிநிதிகள் சுமார் இருநூறு பேர் இதில் கலந்து கொண்டனர். மாநாட்டுக்கு வளவாளராக இந்திய தமிழ்நாட்டு இயேசு சபையைச் சேர்ந்த அருட்பணியாளர் ஜெறி அடிகளார் கலந்துகொண்டு சிறப்புரைகள் வழங்கினார்.
மூன்று தினங்களும் கலந்துகொண்ட மன்னார் ஆயர் இம்மானுவேல் பெர்னாண் டோ ஆண்டகை, இறுதிநாள் மாநாட்டை முடித்துவைக்கும் நிகழ்வில் உரையாற்றுகையில்,
எமது மன்னார் மறைமாவட்டத்தில் கத்தோலிக்க மக்கள் எந்த பங்கில் இருந்தாலும் அவர்கள் துன்பத்துக்கு உள்ளாகும்போது நாம் அனைவரும் ஒன்றித்து கைகொடுத்து உதவ வேண்டும்.
மாந்தை, திருக்கேதீஸ்வரம் பிரச்சினை விடயமாக இங்கு பிரஸ்தாபிக்கப்பட்டது.
அப்பகுதி மக்கள் பல துன்பங்களுக்கு உள்ளாகி இருக்கும் போது அவர்களின் துன்பத்தில் நாமும் அவர்களுடன் இரண்டறக்கலக்க வேண்டும். ஊடகங்கள் எதையும் வெளியிடலாம். இப்பிரச்சினையை ஒரு பெரும் பிரச்சினையென சித்தரித்து காட்டலாம். ஆனால் நாம் மதங்களுக்கிடையே நல்லிணக்கம் ஏற்பட வேண்டும் என்ற சிந்தனையிலேயே செயல்பட்டு வருகின்றோம்.
இம் மாந்தை திருக்கேதீஸ்வரம் வளைவு சம்பந்தமாக நாங்கள் அருட்பணியாளர்கள் கொண்ட ஒரு குழுவாகச் சென்று ஆறு முறை அவர்களைச் சந்தித்துள்ளோம்.
இறுதியாக இடம்பெற்ற இந்த விடயம் தொடர்பில் நாங்கள் அவர்களுக்கு குறிப்பிட்ட இடமொன்றை காண்பித்தவேளையில் தாங்கள் பிறகு வந்து தெரிவிக்கின்றோம் என தெரிவித்து சென்றார்கள். அதன் பின்பு எவ்வித பதிலும் எமக்கு அவர்கள் தெரிவிக்கவில்லை.
இருந்தபோதும் நாங்கள் ஒரு நல்ல நிலைக்கு கொண்டு வருவதற்காக தொடர்ந்து எங்கள் முயற்சிகளை மேற்கொண்டு வருகின்றோம்.
இவ் விடயம் தற்பொழுது நீதிமன்றத்தில் நிலுவையில் இருக்கின்றபோதும் சமயங்களுக்கிடையே நல்லிணக்கத்தை கவனத்தில் கொண்டு நாங்கள் சுமுகமாக தீர்ப்பதிலேயே எங்கள் கவனத்தை செலுத்தி வருகின்றோம்.
இப் பிரச்சினை தீர்க்கப்பட்டு சமயங்களுக்கிடையே நல்லிணக்கம் மலர வேண்டும் என நாம் அனைவரும் ஒன்றித்து இறைவனிடம் வேண்டுவோம்.
இது இவ்வாறு இருக்க திருச்சபை சட்டத்தின்படி எமது மறைமாவட்டத்தில் அருட்பணி பேரவை ஒன்று உருவாக்கப்பட வேண்டும்.
இதற்காக நாங்கள் பலவிதத்திலும் ஆலோ சனைகளை மேற்கொண்டு வருகின்றோம். இது புதிதானதொன்றல்ல. ஏற்கனவே இது அமைக்கப்பட்டதொன்றாகும்.