Eelamurasu Australia Online News Portal
கனடாவானது மாகாண ரீதியில் புகலிடக் கோரிக்கையாளர்களுக்கு சட்ட உதவிகளை வழங்குவதற்காக 26.8 மில்லியன் கனேடிய டொலரை ஒதுக்கீடு செய்யவுள்ளதாக அந்நாட்டுப் பிரதமர் ஜஸ்டின் ரூடோ நேற்று முன்தினம் திங்கட்கிழமை அறிவித்துள்ளார்.
புகலிடக்கோரிக்கையாளர்களுக்கு வழங்கப்படும் சட்ட உதவி சேவை யில் மாகாண ரீதியாக மேற்கொள்ளப்பட்ட துண்டிப்பால் ஏற்பட்டுள்ள பாதிப்பை ஈடு செய்யும் முகமாக மேற்படி தொகை ஒதுக்கீடு செய்யப்பட்டுள்ளது.
கனடாவின் அதிக தொகையைக் கொண்ட மாகாணமான ஒன்ராறியோவின் முதலமைச்சர் டக் போர்ட் புகலிடக் கோரிக்கையாளர்களுக்கான மேற்படி நிதியிடலுக்கு மத்திய அரசாங்கமே பொறுப்பு எனத் தெரிவித்து அவர்களுக்கான நிதியில் துண்டிப்பை மேற்கொண்டிருந்தார்.
இந்நிலையில் ஜஸ்டின் ரூடோவின் அரசாங்கம் நிலைமையை பழைய நிலைக்குக் கொண்டு வர நடவடிக்கை எடுத்துள்ளதாகக் கூறப்படுகிறது.
எதிர்வரும் ஒக்டோபர் மாதம் நடைபெறவுள்ள பொதுத் தேர்தலையொட்டியே இந்த நடவடிக்கை எடுக்கப்பட்டுள்ளமை குறிப்பிடத்தக்கது.
ஒன்ராறியோ மாநிலத்தால் விடுக்கப்பட்ட கோரிக்கைக்கு இணங்க அந்த மாநிலத்துக்கு அரசாங்க நிதி ஒதுக்கீடு செய்வது குறித்து பிரதமர் ஜஸ்டின் ரூடோ இதற்கு முன் எதையும் குறிப்பிட்டுக் கூறியிருக்காத நிலையில் அவரால் தற்போது மேற்கொள்ளப்பட்டுள்ள அறிவிப்பு நிலைமையை மாற்றியுள்ளதாக தெரிவிக்கப்படுகிறது.
“நாங்கள் ஒன்ராறியோவிலுள்ள மக்களின் பக்கம் நிற்கிறோம். அந்த வகையில் புகலிடக்கோரிக்கையாளர்கள் தமக்குத் தேவையான சட்ட சேவைகளைப் பெற்றுக்கொள்வதை உறுதிப்படுத்துகிறோம்” என ஜஸ்டின் ரூடோ தன்னால் வெளியிடப்பட்டுள்ள அறிக்கையில் குறிப்பிட்டுள்ளார்.
அமெரிக்க ஜனாதிபதியாக டொனால்ட் ட்ரம்ப் 2017ஆம் ஆண்டு ஜனவரி மாதம் பதவியேற்ற பின்னர் அமெரிக்க-கனேடிய எல்லையைக் கடந்து புகலிடக்கோரிக்கையாளர்கள் கனடாவுக்குள் பிரவேசிப்பது அதிகரித்ததையடுத்து கனேடிய மத்திய அரசாங்கத்துக்கும் ஒன்ராறியோ மாகாண அரசாங்கத்துக்குமிடையிலான பதற்ற நிலை அதிகரித்துள்ளது.
புகலிடக்கோரிக்கையாளர்களுக்கான சட்ட உதவிக்கான நிதி ஒதுக்கீட்டில் மேற்கொள்ளப்பட்ட துண்டிப்பு குறித்து சட்ட உதவி சமூகங்களும் அகதிகளுக்கான சட்டத்தரணிகளும் குற்றஞ்சாட்டியிருந்தனர். மேற்படி சட்ட உதவிகளுக்கான நிதி ஒதுக்கீடு நீக்கப்படுகின்றமையானது புகலிடக் கோரிக்கையாளர்களுக்கும் அகதிகளுக்குமுள்ள தமது நியாயமான கோரிக்கைகளை முன்வைப்பதற்கான ஆற்றலுக்கு அச்சுறுத்தலாகவுள்ளதாக அவர்கள் தெரிவித்திருந்தனர்.
இந்நிலையில் ஜஸ்டின் ரூடோவால் தற்போது மேற் கொள்ளப்பட்ட அறிவிப்பு குறித்து தாம் பெரிதும் மகிழ்ச்சிய டைவதாக அகதிகளுக்கான கனேடிய சபையின் நிறைவேற்றுப் பணிப்பாளர் ஜனட் டென்ச் தெரிவித்தார்.