Eelamurasu Australia Online News Portal
யாழ்ப்பாணம் கொக்குவில் பகுதியில் உள்ள வீடொன்றின் மீது பெற்றோல் குண்டுகள் வீசி தாக்குதல் சம்பவத்தையடுத்து அங்கு சென்று காணொளிப் பதிவில் ஈடுபட்டிருந்த ஊடகவியலாளர் ஒருவரை தாக்கிய குற்றச்சாட்டில் கோப்பாய் காவல் துறை நிலைய பதில் பொறுப்பதிகாரியைக் கைது செய்ய உத்தரவிடப்பட்டுள்ளது.
இந்த நிலையில் கோப்பாய் காவல் துறை நிலைய பதில் பொறுப்பதிகாரி யாழ்ப்பாணம் தலைமையக காவல் துறை நிலையத்துக்கு அழைக்கப்பட்டு விசாரணைக்கு உள்படுத்தப்பட்டுள்ளார்.
ஊடகவியலாளரைத் தாக்கிய கோப்பாய் காவல் துறை நிலைய பதில் பொறுப்பதிகாரி தற்போது விசாரணைக்குட்படுத்தப்பட்டுள்ளார். அவர் இன்று புதன்கிழமை கைது செய்யப்பட்டு யாழ்ப்பாணம் நீதிவான் நீதிமன்றில் முற்படுத்தப்படுவார் என்று காவல் துறை ஊடகப் பேச்சாளர் அலுவலகம் தெரிவித்துள்ளது.
கொக்குவில் கருவப்புலம் வீதியில் அமைந்துள்ள வீடொன்றின் மீது பெற்றோல் குண்டுகள் வீசி கும்பல் ஒன்று அடாவடியில் ஈடுபட்டுத் தப்பித்தது.
அதையடுத்து சம்பவ இடத்திற்கு சென்ற ஊடகவியலாளர் ஒருவர் சம்பவம் தொடர்பான காணொளிப் பதிவியில் ஈடுபட்டிருந்தார். இதன்போது அவரின் பணியைத் தடுக்கும் வகையில் கோப்பாய் காவல் துறை நிலைய பதில் பொறுப்பதிகாரி செயற்பட்டதுடன், முகத்தில் தாக்கினார் என்று தெரிவிக்கப்பட்டது.
தாக்குதலுக்குள்ளான செய்தியாளர் யாழ்ப்பாணம் போதனா வைத்தியசாலையில் சிகிச்சை பெற்றார். அத்துடன் அவரிடம் காவல் துறை முறைப்பாடும் பெறப்பட்டது.
இது தொடர்பில் வடக்கு மாகாண மூத்த பிரதி காவல் துறை மா அதிபருக்கு தகவல் வழங்கப்பட்டது. சம்பவ தொடர்பில் உடனடி விசாரணைக்கு யாழ்ப்பாணம் உதவி காவல் துறை அத்தியட்சகர் – 2 இற்கு அறிவுறுத்தல் வழங்கினார்.