தென்ஆப்பிரிக்காவை 7 ரன் வித்தியாசத்தில் வீழ்த்தியது ஆஸ்திரேலியா!

அடிலெய்டில் நடைபெற்ற 2-வது ஒருநாள் போட்டியில் தென்ஆப்பிரிக்காவை 7 ரன் வித்தியாசத்தில் வீழ்த்தி தொடரை உயிரோட்டமாக வைத்துள்ளது ஆஸ்திரேலியா.

அடிலெய்டில் நடைபெற்ற 2-வது ஒருநாள் போட்டியில் தென்ஆப்பிரிக்காவை 7 ரன் வித்தியாசத்தில் வீழ்த்தி தொடரை உயிரோட்டமாக வைத்துள்ளது ஆஸ்திரேலியா. #AUSvSA

ஆஸ்திரேலியா – தென்ஆப்பிரிக்கா இடையில் மூன்று போட்டிகள் கொண்ட ஒருநாள் கிரிக்கெட் தொடர் நடைபெற்று வருகிறது. பெர்த்தில் நடைபெற்ற முதல் ஆட்டத்தில் தென்ஆப்பிரிக்கா 6 விக்கெட் வித்தியாசத்தில் வெற்றி பெற்றது.

இந்நிலையில் 2-வது போட்டி அடிலெய்டில் இன்று நடைபெற்றது. இந்த போட்டியில் வெற்றி பெற்றால் மட்டுமே தொடரை உயிரோட்டமாக வைத்திருக்க முடியும் என்பதால் வெற்றி பெற்றேயாக வேண்டும் என்ற கட்டாயத்தில் ஆஸ்திரேலியா களம் இறங்கியது.

டாஸ் வென்ற தென்ஆப்பிரிக்கா பந்து வீச்சு தேர்வு செய்தது. அதன்படி ஆஸ்திரேலியா முதலில் களம் இறங்கியது. தொடக்க வீரர் ஆரோன் பிஞ்ச் (41), கிறிஸ் லின் (44), விக்கெட் கீப்பர் அலெக்ஸ் கேரி (47) ஆகியோரின் சராசரி ஆட்டத்தால் ஆஸ்திரேலியா 48.3 ஓவரில் 231 ரன்கள் சேர்த்து ஆல்அவுட் ஆனது. தென்ஆப்பிரிக்கா அணி சார்பில் ரபாடா நான்கு விக்கெட்டுக்களும், பிரிடோரியஸ் 3 விக்கெட்டுக்களும், டேல் ஸ்டெயின் இ ரண்டு விக்கெட்டுக்களும் வீழ்த்தினார்கள்.

பின்னர் 232 ரன்கள் எடுத்தால் வெற்றி என்ற இலக்குடன் தென்ஆப்பிரிக்காவின் டி காக், ஹென்ரிக்ஸ் ஆகியோர் தொடக்க வீரர்களாக களம் இறங்கினார்கள். டிக் 9 ரன்னிலும், ஹென்ரிக்ஸ் 16 ரன்னிலும் வெளியேறினார்கள். 3-வது வீரராக களம் இறங்கிய மார்கிராம் 19 ரன்னில் ரன்அவுட் ஆனார்.

ஒரு கட்டத்தில் தென்ஆப்பிரிக்கா 68 ரன்கள் சேர்ப்பதற்குள் நான்கு விக்கெட்டுக்களை இழந்தது. ஐந்தாவது விக்கெட்டுக்கு கேப்டன் டு பிளிசிஸ் உடன் அதிரடி பேட்ஸ்மேன் டேவிட் மில்லர் ஜோடி சேர்ந்தார். இந்த ஜோடி சிறப்பான ஆட்டத்தை வெளிப்படுத்தியது.

அணியின் ஸ்கோர் 142 ரன்னாக இருக்கும்போது டு பிளிசிஸ் 47 ரன்கள் எடுத்த நிலையில் வெளியேறினார்கள். அடுத்து வந்த கிளாசன் 14 ரன்கள் மட்டுமே சேர்த்தார்.

டேவிட் மில்லர் கடைசி நிலை பேட்ஸ்மேன்களை வைத்து வெற்றிக்காக போராடினார். ஆனால் 51 ரன்கள் எடுத்த நிலையில் 8-வது விக்கெட்டாக ஆட்டமிழந்தார். மில்லர் ஆட்டமிழக்கும்போது தென்ஆப்பிரிக்கா 187 ரன்கள் எடுத்திருந்தது. 45 ரன்கள் தேவைப்பட்டது.

ரபாடா 9 ரன்கள் எடுத்த நிலையில் வெளியேறினார். கடைசி விக்கெட்டுக்கு லுங்கி நிகிடி உடன் இம்ரான் தாஹிர் ஜோடி சேர்ந்தார். இவர் இணையும்போது 17 பந்தில் 29 ரன்கள் தேவைப்பட்டது. ஆனால் தென்ஆப்பிரிக்கா 50 ஓவர் முடிவில் 9 விக்கெட் இழப்பிற்கு 224 ரன்கள் மட்டுமே எடுத்தது. இதனால் ஆஸ்திரேலியா 7 ரன் வித்தியாசத்தில் வெற்றி பெற்றது. நிகிடி 19 ரன்னுடனும், இம்ரான் தாஹிர் 11 ரன்னுடனும் ஆட்டமிழக்காமல் இருந்தனர். தென்ஆப்பிரிக்கா அணி சார்பில் ஸ்டாய்னிஸ் 3 விக்கெட்டுக்களும், ஸ்டார்க் மற்றும் ஹசில்வுட் தலா இரண்டு விக்கெட்டுக்களும் வீழ்த்தினார்கள்.

இந்த வெற்றியின் மூலம் தொடரை 1-1 என சமநிலைப் படுத்தியது ஆஸ்திரேலியா. இரு அணிகளுக்கும் இடையிலான கடைசி போட்டி நாளைமறுநாள் (11-ந்தேதி) நடக்கிறது. அதன்பின் ஒரேயொரு டி20 போட்டி 17-ந்திகதி நடக்கிறது.