இந்தியாவுக்கு எதிரான டி20: கம்மின்ஸ் விலகல்!

இந்தியாவுக்கு எதிரான 3 போட்டிகள் கொண்ட டி20 கிரிக்கெட் தொடரிலிருந்து விலகியுள்ளார் அவுஸ்ரேலிய வேகப்பந்து வீச்சாளர் பேட் கம்மின்ஸ்.

இங்கிலாந்துக்கு எதிரான ஆஷஸ் தொடருக்கு தயாராவதற்காக இந்தியாவுக்கு எதிரான ஒரு நாள் தொடர் முடிந்ததும் கம்மின்ஸ் நாடு திரும்புகிறார்.

இந்தியா-அவுஸ்ரேலியா இடையிலான கடைசி ஒரு நாள் ஆட்டம் அக்டோபர் 1-ஆம் திகதி நாகபுரியில் நடைபெறுகிறது. அது முடிந்ததும் கம்மின்ஸ் ஆஸ்திரேலியா திரும்பவுள்ளதாக ஆஸ்திரேலிய கிரிக்கெட் வாரியம் தெரிவித்துள்ளது.

கம்மின்ஸ்,அவுஸ்ரேலியாவில் நடைபெறும் ஷெப்பீல்டு ஷீல்டு போட்டியில் பங்கேற்கவுள்ளார். கம்மின்ஸுக்குப் பதிலாக மாற்று வீரர் விரைவில் அறிவிக்கப்படவுள்ளார்.

இது தொடர்பாக அவுஸ்ரேலிய அணியின் தேர்வுக் குழு தலைவர் டிரெவர் ஹான்ஸ் கூறுகையில், காயத்திலிருந்து மீண்டு அணிக்குத் திரும்பிய கம்மின்ஸ், இந்த ஆண்டு தொடர்ச்சியாக ஏராளமான போட்டிகளில் விளையாடிவிட்டார். இப்போது அவர் நல்ல உடற்தகுதியுடன் இருந்தாலும், ஆஷஸ் தொடருக்கு முன்னதாக அவர் உடலளவிலும், மனதளவிலும் புத்துணர்வோடு இருப்பது அவசியமாகும் என்றார்.